ꓞꓳ ꓟꓳꓽ ꓐꓰ ꓬꓲ. ꓤ ꓔꓲ. ꓕꓲ ꓣꓳ ꓮ ꓠꓱ ꓥꓳꓽ=

ꓬꓲ ꓢꓯꓼ ꓠ ꓠ, ꓢꓲ ꓕꓳ ꓶ ꓝꓳ, ꓵꓻ ꓪ ꓝꓲ ꓡꓯ=

………………………………

ꓞꓳ ꓟꓳꓽ ꓐꓰ ꓬꓲ. ꓤ ꓔꓲ. ꓕꓲ ꓣꓳ ꓮ ꓠꓱ ꓥꓳꓽ=

ꓮ ꓠꓱ ꓟꓶꓽ ꓠꓱ ꓕꓽ ꓞꓳ ꓟꓳꓽ ꓕꓲ ꓣꓳ ꓐꓰ ꓬꓲ. ꓤ ꓔꓲ. ꓕꓲ ꓣꓳ ꓔꓬ,ꓼ ꓙꓳꓽ= ꓬꓲ. ꓤ ꓔꓲ. ꓠꓬ ꓮ ꓡꓲ ꓥˍꓟꓲ ꓞꓳ ꓟꓳꓽ ꓟ. ꓘꓶꓽ ꓟꓽ ꓠ ꓠ,꓾ ꓕꓲ ꓠꓬꓲ ꓕꓲ ꓠꓬꓲ ꓶ Cꓳ꓾  ꓤ ꓖꓴ ꓡꓯ. ꓒꓽ ꓗꓷ ꓡꓰ ꓖꓶ ꓟꓬꓱꓽ ꓟꓽ ꓬꓰ= ꓞꓳ ꓟꓳꓽ ꓗꓯ. ꓠꓯ. ꓖꓶ ꓟꓬꓱꓽ ꓟꓽ ꓬꓰ= ꓠꓯꓼ ꓠꓯꓼ ꓠꓲ, ꓞ, ꓟꓽ ꓔꓴ꓾ ꓔꓴ ꓡ ꓖꓶ ꓜꓻ ꓜꓽ ꓢꓲ ꓶ Cꓳ ꓬꓰ ꓟꓬꓱꓽ ꓟꓽ ꓬꓰ ꓕꓱ ꓡꓱ ꓔ ꓥ ꓙꓳꓽ= ꓕꓲ ꓠꓬꓲ ꓙꓳˍꓕꓽ ꓬꓲ. ꓛꓳ ꓒꓯ, ꓤꓽ ꓛꓲꓽ ꓕꓲ ꓣꓳ ꓐꓰ ꓕꓲ ꓪꓸꓼ ꓡꓳ ꓙꓳꓽ=

ꓳ ꓕꓽ ꓬꓲ. ꓒꓽ ꓠꓲ ꓢꓲ, ꓡ ꓢꓲ ꓬꓲ. ꓤ ꓔꓲ. ꓟ ꓔꓯ ꓫ ꓪ ꓟ. ꓔ ꓥ ꓙꓳꓽ= “ꓥ ꓤ ꓠꓴ ꓕꓲ ꓠꓬꓲ ꓕꓲ ꓠꓬꓲ ꓶ Cꓳ꓾ ꓮ ꓐ ꓠꓽ ꓟꓬꓱꓽ ꓬꓰ ꓬꓰ ꓠꓲ ꓟꓽ ꓖꓲꓼˍꓪ= ꓠꓴ ꓠꓽ ꓠꓯꓼ ꓠꓯꓼ ꓖꓶ ꓠꓲ ꓞ, ꓟꓽ ꓔꓴ꓾ ꓠꓯꓼ ꓠꓯꓼ ꓠꓲ ꓞ, ꓔꓴ ꓢꓲ ꓦꓲꓻ ꓒ ꓕꓲ ꓗꓪ ꓟꓬꓱꓽ ꓙꓳ ꓫꓵꓽ ꓟꓬꓱꓽ ꓬꓰ꓾ ꓜꓻ C.꓾ ꓜꓻ ꓔꓲ.꓾ ꓢꓲ, Cꓳ. ꓘꓶꓽ ꓕꓱ ꓡꓱ ꓬꓰ ꓢꓲ꓾ ꓜꓻ ꓜꓽ Dꓳ ꓟꓶꓺ ꓕꓱꓼ ꓦ ꓟꓲ ꓗꓪ ꓙꓰ= ꓟꓳꓼ ꓡꓳ ꓗꓪ ꓦ ꓟꓲ ꓬꓰ ꓮ‐ꓖꓳ ꓥꓪꓺ꓾ ꓜꓻ ꓔꓶꓺ ꓙꓵ, ꓗꓪ ꓜꓻ ꓔꓶꓺ꓾ ꓢꓲ, Cꓳ. ꓧꓪꓺ ꓙꓵ, ꓗꓪ ꓢꓲ, Cꓳ. ꓧꓪꓺ= ꓜꓻ ꓫꓺ ꓙꓵ, ꓗꓪ ꓜꓻ ꓫꓺ ꓢꓲ ꓠꓬꓲ꓾ ꓞꓳ ꓟꓳꓽ ꓔꓯ ꓠꓴ ꓟꓬꓱꓽ ꓮ ꓘꓶ. ꓬꓰ ꓙ ꓡ ꓠ ꓔꓳ. ꓫꓵꓽ ꓥ= ꓳ ꓫꓵꓽ ꓠꓴ ꓕꓲ ꓠꓬꓲ ꓕꓲ ꓠꓬꓲ ꓶ Cꓳꓺ꓾ ꓐꓰ ꓐꓯ ꓢꓲ ꓠꓬꓲ ꓬꓲ. ꓤ ꓟ ꓔꓯ ꓕꓱ ꓡꓱ ꓟ. ꓔꓬ, ꓙꓳꓽ=”

ꓖꓳ ꓕꓯꓽ ꓬꓲ. ꓤ ꓟ ꓔꓯ ꓜ ꓟꓬ, ꓫꓵꓽ ꓟꓬꓱꓽ ꓬꓰ ꓡꓳ. ꓬꓰ Cꓱ, ꓟ. ꓠꓬ ꓕꓽ ꓠꓽ ꓠꓲ ꓾ ꓬꓲ ꓤꓽ ꓟ ꓬꓲ ꓔꓯ ꓟꓽ ꓠ ꓠ, ꓡ꓾ ꓖꓳ ꓢ ꓬꓲ ꓗ, ꓛꓳꓽ ꓤꓽ ꓛꓲꓽ ꓟ ꓢꓲ꓾ “ ꓳꓺ ꓥꓪ ꓔꓯ ꓠꓽ ꓮ ꓐ ꓟꓽ ꓠꓬ, Dꓴ ꓟ ꓠꓲ꓾ ꓕꓱ ꓡꓱ ꓟ. ꓖꓶꓽ ꓢꓴ ꓟꓽ ꓠꓬ, Dꓴ ꓟ ꓠꓲ ꓟꓬꓱꓽ ꓬꓰ ꓟꓽ ꓗꓴ. ꓔꓳ ꓫꓵꓽ ꓥ ꓐꓶ ꓐꓯ ꓢꓲ꓾ ꓮ ꓑ ꓕꓲ ꓣꓳ ꓟ ꓠꓲ ꓟ. ꓡ Dꓴ ꓟ ꓔꓯ ꓠꓬ ꓥꓪ ꓛꓳ Dꓴ ꓥ ꓪ ꓐꓯ ꓢꓲ꓾ ꓖꓳ ꓢ ꓬꓲ. ꓟꓯꓼ ꓟ ꓔꓯ ꓮ ꓡꓲ ꓟ. ꓔ ꓠꓬ ꓖꓳ ꓡꓱ “ꓠꓯꓼ ꓠꓯꓼ ꓔꓴ꓾ ꓜꓻ C.꓾ ꓦꓲꓻ ꓘꓴꓽ ꓟꓬꓱꓽ ꓬꓰ꓾ ꓜꓻ ꓜꓽ Dꓳ ꓕꓽ ꓦ ꓟꓲ ꓗꓪ ꓙꓰ= ꓟꓬꓱꓽ ꓬꓰ ꓝꓲ ꓗꓪ ꓟꓬꓱꓽ ꓬꓰ꓾ ꓜꓻ ꓔꓶꓺ ꓙꓵ, ꓗꓪ ꓜꓻ ꓔꓶꓺ꓾ ꓢꓲ, Cꓳ. ꓧꓪꓺ ꓙꓵ, ꓗꓪ ꓢꓲ, Cꓳ. ꓧꓪꓺ꓾ ꓜꓻ ꓫꓺ ꓙꓵ, ꓗꓪ ꓜꓻ ꓫꓺ꓾ ꓐꓱ ꓘꓴꓽ ꓟꓬꓱꓽ ꓬꓰ ꓝꓮꓲ ꓕꓲ ꓫꓵꓽ ꓗ. ꓠꓯ. ꓕꓲ ꓫꓵꓽ ꓟꓬꓱꓽ ꓬꓰ꓾ ꓜꓽ ꓪꓳ ꓡꓳ. ꓪꓳ ꓔꓶꓺ ꓗꓴ. ꓬꓰꓳ ꓙꓳꓽ=”

ꓖꓳ ꓕꓯꓽ ꓤꓽ ꓛꓲꓽ ꓖꓳ ꓕꓲ ꓣꓳ ꓠꓬ ꓠꓬ, ꓙꓲꓻ ꓬꓰ ꓢꓲ ꓞꓳ ꓐꓳ꓾ ꓠꓬ, ꓙꓲꓻ ꓙꓳ ꓙꓲꓻ ꓬꓰ ꓢꓴ ꓕꓲ ꓣꓳ ꓒꓬꓱꓼ ꓡꓻꓳ ꓙꓳꓽ= ꓖꓳ ꓡꓱ ꓠꓬꓲ ꓞꓳ ꓟꓳꓽ ꓐꓯ ꓑꓶꓺ ꓗꓪ ꓠꓽ ꓠꓲ꓾ “ ꓣꓳꓽ ꓜꓽ ꓟ. ꓢꓴ ꓤꓽ ꓢꓷ.= ꓛꓬ, ꓥꓳ, ꓮ ꓠꓯꓺ ꓢꓷ.” ꓐꓯ Cꓰꓼ ꓥ ꓙꓳꓽ=

ꓮ ꓠꓱ ꓥꓳꓽ C ꓟꓲꓽ ꓠꓬ ꓕꓱ ꓗꓪ ꓛꓲ ꓡꓰ ꓥꓳ= Share and Comment

ꓮ ꓠꓱ ꓥꓳꓽ ꓚ ꓢꓴ꓾ ꓞꓳ ꓔꓲꓺ ꓪ‐ꓩꓴ‐ꓬꓳ

Wlisu
Spread the love

Leave a Reply

Your email address will not be published.