ꓟꓶꓽ ꓡꓰ ꓒꓲꓼ ꓡꓰˍꓟ ꓡꓲ-ꓢꓴ ꓢꓯꓼ ꓪꓽ ꓓꓽ ꓙꓳ ꓢꓴ 3 ꓣꓳ ꓚꓺ ꓟꓲꓽ꓿

ꓮꓽ ꓠꓱꓺ ꓟꓶ ꓠꓱꓺ ꓕꓯꓽ꓾ ꓣꓳꓽ ꓡꓲ-ꓢꓴ ꓮ ꓑꓺ ꓒꓲꓽ ꓮꓸ ꓣꓽ ꓒꓲꓽ ꓐꓴ ꓦꓬꓼ ꓠꓬꓲ ꓗꓪ ꓢꓯꓼ ꓪꓽ ꓓꓽ ꓟ ꓙꓳ ꓢꓴ꓾ ꓤ ꓠꓱꓻ ꓢ ꓫꓵꓸ ꓙꓳ_ꓡꓳ꓿

Image@lisunews

ꓕꓲꓽ ꓠꓬꓲꓺ ꓙꓳˍꓕꓯꓽ꓾ ꓡꓲ-ꓢꓴ ꓮ ꓑꓺ ꓒꓲꓽ ꓮꓸ ꓣꓽ ꓒꓲꓽ ꓐꓴ ꓠꓬ꓾ ꓞꓲꓼ ꓟꓳꓽ ꓡ ꓔꓬˍꓟ ꓪꓴꓸ ꓠꓬꓲ꓾ ꓬꓲꓸ ꓪ ꓤ ꓠꓱ ꓢ ꓫꓵꓸ ꓔꓯ꓾ ꓟꓲꓸ ꓙꓬꓽ ꓢꓲ ꓗꓪ ꓜꓲꓼ ꓡ ꓝꓲ ꓢꓲ꓾ “ꓥꓪ ꓤꓽ ꓢ ꓫꓵ.ꓳ ꓮꓽ ꓐꓽ ꓐꓴ ꓧꓪ ꓖꓳ Dꓱꓽ ꓡꓳ, ꓬꓰ ꓕꓯꓽ ꓠꓴꓻ ꓪ ꓢ ꓫꓵꓸ ꓠꓬ ꓗꓹ ꓗꓹ ꓛꓲꓽ ꓛꓲꓽ ꓐꓰ ꓕꓲꓽ ꓠꓲꓹ ꓕꓲꓽ ꓪꓸꓼ ꓔꓬꓹ ꓓꓴ ꓬꓰ ꓥꓻꓰ… ꓥꓪ ꓤꓽꓳ…ꓠꓴꓻ ꓪ 3 ꓫꓵ. ꓠꓬ ꓕꓲꓽ ꓠꓲꓹ ꓕꓲꓽ ꓪꓸꓼ ꓐꓰ ꓟꓽ ꓔꓬꓹ ꓟ ꓦꓬꓼ ꓠꓬꓲ ꓗꓪ ꓠꓬ꓾ ꓠꓴꓻ ꓪꓽ ꓠꓯꓸꓼ ꓗꓪ ꓙꓳˍꓟ ꓢꓯꓼ ꓪꓽ ꓓꓽ ꓟ ꓠꓬ ꓟꓶꓽ ꓡꓰ ꓖꓴꓺ ꓡꓰˍꓥꓳ꓾ ꓐꓰ ꓡꓯꓼ ꓘꓪꓽ/ꓡꓯꓼ ꓪ ꓘꓶꓽ ꓕꓲꓽ ꓘꓶꓽ꓾ ꓤꓽ ꓠꓱ ꓐꓴ ꓢ ꓫꓵꓸ ꓠꓯꓸꓼ ꓗꓪ ꓛꓬꓹ ꓖꓶꓽ ꓗꓷˍꓡꓳ=” ꓟꓽ ꓟꓶꓺ ꓫꓵꓺ ꓕꓯꓽ ꓬꓲ ꓐꓹ ꓐꓽ ꓟꓹ ꓟ ꓐꓴ ꓠꓬ ꓫꓵꓳꓺ꓿

ꓖꓳ ꓕꓯꓽ ꓬꓲꓸ ꓐꓹ ꓐꓽ ꓐꓴ ꓟꓽ ꓠꓬꓹ ꓡꓰ ꓟ ꓦꓬꓼ ꓠꓬꓲ ꓗꓪ ꓤꓽ ꓠꓱ ꓐꓴ 3 ꓫꓵꓸ ꓠꓬ꓾ ꓬꓲꓸ ꓐꓹ ꓐꓽ ꓟꓹ ꓟ ꓡꓯꓼ ꓘꓪꓽ/ꓡꓯꓼ ꓪ ꓘꓶꓽ ꓔꓯ ꓫꓺ ꓒꓵꓽ ꓢꓲ꓾ꓬꓲꓸ ꓪ ꓔꓬ ꓟꓵꓽ ꓗꓪ ꓐꓰ ꓔꓬꓹ ꓢꓲ꓾ ꓧꓪꓽ ꓧꓪꓺ꓾ ꓧꓪꓽ ꓖꓼ꓾ ꓦꓺ ꓟꓲ ꓛꓬꓽ ꓠꓬꓲ ꓐꓰ꓾ ꓕꓲꓽ ꓠꓲꓹ ꓕꓲꓽ ꓪꓸꓼ ꓔꓬꓹˍꓡꓳ꓿ ꓬꓲ ꓪ ꓣꓳ ꓠꓬ꓾ ꓢꓯꓼ ꓪꓽ ꓮ ꓘꓶ. ꓙꓳ ꓢꓴ ꓥꓹ ꓟ ꓪꓴꓸ ꓠꓬꓲ꓾ ꓢꓲꓹ ꓠꓯꓺ ꓟꓵꓽ ꓗꓪ ꓧꓪꓽ ꓕꓲꓽ ꓧꓪꓹ ꓤꓼ ꓖꓼˍ ꓟꓲ꓾ ꓚꓱꓸ ꓗꓸ ꓕꓲꓽ ꓑꓶꓸ ꓗꓪ꓾ ꓧꓪꓽ (ꓛꓵꓺ)🦌 ꓢ ꓘꓹ ꓚꓱꓸ ꓢꓲ꓾ ꓡꓽ ꓙꓰˍꓡꓳ꓿ ꓟꓬꓱꓽ ꓬꓰ ꓡꓳꓹ ꓬꓰ꓾ ꓦꓺ ꓟꓲ ꓒꓬꓽ ꓥˍꓟꓲ꓾ ꓢꓯꓼ ꓪꓽ ꓓꓽ ꓙꓳ ꓢꓴ ꓥꓹ ꓟ ꓪꓴꓸ ꓠꓬꓲ꓾ ꓪꓽ ꓜꓱꓽ 4 ꓟ 5 ꓟ (4 ꓪꓽ ꓜꓱꓽ 5 ꓪꓽ ꓜꓱꓽ) ꓗꓪ ꓒꓽ ꓐꓲꓺ ꓜꓻ ꓔꓶꓻˍꓔꓯ ꓔꓬꓹˍ ꓡꓳ꓿ ꓖꓳ ꓕꓯꓽ ꓠꓱꓸ ꓐꓯꓼ ꓘꓹ ꓗꓪ ꓔꓬꓹ ꓟ ꓡꓽ ꓞꓳ ꓐꓴ ꓠꓬ꓾ ꓢꓯꓼ ꓪꓽ ꓓꓽ ꓟ ꓙꓳ ꓢꓴ ꓬꓲ ꓪ ꓣꓳ ꓔꓯ ꓡꓳꓸ ꓟꓳ ꓗꓷˍꓕꓯꓽ ꓕꓱ ꓡꓱ ꓐꓯˍꓡꓳ= “ꓬꓲ ꓪ 3 ꓣꓳ ꓣꓳꓽ ꓐꓴ ꓔꓬꓹ ꓟꓵꓽ ꓗꓪ ꓔꓬꓹ ꓠꓬ꓾ ꓟꓲꓽ ꓕꓯꓽ ꓢꓲꓺ ꓗꓪ ꓣꓳꓽ ꓐꓴ ꓧꓪꓽ ꓖꓼ ꓧꓪꓽ ꓧꓪꓺ ꓠꓹ ꓟ ꓠꓬ ꓧꓪꓺ ꓫꓸ ꓡꓰˍꓥꓳ” ꓐꓰ ꓓꓵꓽ ꓙꓽ ꓢꓲ ꓤꓽ 3 ꓫꓵꓸ ꓐꓴ ꓕꓲꓽ ꓖꓺ ꓕꓲꓽ ꓟꓵꓽ꓾ ꓕꓲꓽ ꓟꓵꓽ ꓕꓲꓽ ꓡꓳꓺ ꓗꓪ ꓗꓷ ꓡꓰ ꓠꓹ ꓟ ꓠꓲꓹ ꓖꓳꓼ ꓢꓲꓸ ꓙꓽ ꓖꓶꓽ ꓔꓬꓹ ꓡꓳ꓿

ꓖꓳ ꓕꓯꓽ ꓠꓱꓸ ꓐꓯꓼ ꓘꓹ ꓗꓪ ꓔꓬ,ˍꓟ ꓠꓲꓹ ꓖꓳꓼ ꓢꓴ ꓡꓽ ꓞꓳ ꓐꓴ ꓠꓬ꓾ ꓢꓯꓼ ꓪꓽ ꓓꓽ ꓟ ꓙꓳ ꓢꓴ ꓤꓽ ꓪꓴꓸ ꓠꓺ ꓐꓼ ꓕꓲꓽ ꓕꓲꓽ ꓣꓳ ꓔꓬꓹ ꓗꓪ ꓙꓰ ꓢꓲ꓾ ꓕꓱ ꓡꓱ ꓐꓯˍꓡꓳ= ” ꓠꓴꓻ ꓬꓲꓸ ꓐꓶꓹ ꓢꓯꓼ ꓪꓽ ꓙꓳ ꓡ ꓠꓲꓹ ꓫꓵˍꓠꓬ꓾ ꓟꓽ ꓞꓰꓻ ꓬꓲꓻ ꓙꓬ ꓔꓯ ꓧꓪꓺ ꓢꓲ ꓓꓳꓺ꓿ ꓖꓳ ꓕꓯꓽ ꓠꓴꓻ ꓬꓲꓸ ꓐꓶꓹ ꓢꓯꓼ ꓪꓽ ꓙꓳ ꓡ ꓥꓳ” ꓐꓰ ꓠꓲꓹ ꓖꓳꓼˍꓡꓳ꓿ ꓖꓳ ꓕꓯ ꓢꓯꓼ ꓪꓽ ꓓꓽ ꓟ ꓙꓳ ꓢꓴ ꓠꓺ ꓐꓼ ꓕꓲꓽ ꓕꓲꓽ ꓣꓳ ꓠꓬ꓾ ꓟꓽ ꓞꓰꓻ ꓬꓲꓻ ꓙꓬ ꓧꓪꓺ ꓠꓹ ꓟ ꓓꓳꓻ ꓙꓰ ꓢꓲ꓾ ꓙꓬꓻ ꓟꓵꓽ ꓟꓬ-ꓟ ꓗꓴꓷꓼ ꓡꓯꓼ ꓷꓹ ꓖꓽ-ꓟꓶꓽ-ꓓꓰ ꓕꓲꓽ ꓒꓳꓹ ꓗꓪ ꓔꓬꓹ ꓖꓴ ꓦꓲꓻ ꓫꓬꓹ ꓢꓲ꓾ ꓠꓬꓹ ꓔꓬꓹˍꓡꓳ꓿

ꓚꓹ ꓚꓽ (ꓚꓵ ꓚꓵ) ꓐꓯˍꓠꓬ꓾ “ꓟꓽ ꓞꓰꓻ ꓬꓲꓻ ꓙꓬ ꓠꓬ꓾ ꓙꓬ ꓟꓵꓽ ꓗꓪ ꓙꓳˍꓟ ꓪꓽ ꓔꓯ ꓐꓯˍꓟ ꓥꓳ꓿” ꓢꓯꓼ ꓪꓽ ꓓꓽ ꓟ ꓙꓳ ꓢꓴ ꓤꓽ ꓠꓺ ꓐꓼ ꓠꓬꓲꓽ ꓕꓲꓽ ꓣꓳ ꓔꓯ ꓠꓬ꓾ ꓟꓽ ꓬꓲꓻ ꓬꓲꓻ ꓙꓬ ꓔꓯ ꓓꓳꓺ ꓠꓹ ꓟ ꓠꓲꓹ ꓖꓳꓼ ꓢꓲ꓾ ꓧꓳꓽ ꓪꓴꓸ ꓟꓴꓸˍꓡꓳ꓿ ꓤꓽ ꓠꓬ ꓠꓲꓹ ꓦꓯꓸˍꓟ ꓪꓴꓸ ꓠꓬꓲ꓾ ꓟꓬ-ꓟ ꓗꓴꓷꓼ ꓡꓯꓼ ꓘꓳꓽ ꓕꓲꓽ ꓛꓱꓽ ꓔꓯꓸ ꓢꓲ ꓗꓪ꓾ ꓟꓽ ꓬꓲꓻ ꓬꓲꓻ ꓙꓬ ꓔꓯ ꓧꓪꓺ ꓙꓰꓳ꓿

ꓬꓲꓸ ꓟꓶꓽ ꓗꓪ ꓧꓪꓺ ꓠꓽ ꓡꓰ ꓢꓲ ꓮꓽ-ꓢ ꓟꓵꓽ ꓟꓶꓸ ꓙꓬꓽ ꓕꓲꓽ ꓒꓳꓹ ꓗꓪ ꓔꓬꓹ ꓖꓴ ꓦꓲꓻ ꓫꓬꓹ ꓢꓲ꓾ ꓠꓬꓹ ꓔꓬꓹˍꓡꓳ꓿ “ꓟꓽ ꓬꓲꓻ ꓬꓲꓻ ꓙꓬ ꓐꓯˍꓟ ꓠꓬ꓾ ꓬꓲꓻ ꓡꓴꓽ ꓐꓱꓻ ꓓꓽ ꓔꓯ ꓐꓯˍꓟ ꓥꓳ꓿”

ꓖꓳ ꓡꓰ ꓐꓰ ꓠꓱꓸ ꓐꓯꓼ ꓘꓹ ꓗꓪ ꓟ ꓠꓲꓹ ꓖꓳꓼ ꓢꓴ ꓐꓴ꓾ ꓢꓯꓼ ꓪꓽ ꓓꓽ ꓟ ꓙꓳ ꓢꓴ ꓤꓽ ꓬꓲꓸ ꓟꓶꓽ ꓕꓲꓽ ꓣꓳ ꓔꓬꓹ ꓗꓪ ꓙꓰ ꓢꓲ꓾ ꓟꓽ ꓡꓳꓹ ꓪꓽ ꓚꓲꓺ ꓔꓯ ꓧꓪꓺ ꓝꓲˍꓡꓳ꓿ ꓖꓳ ꓕꓯꓽ ꓤꓽ ꓠꓬ ꓟꓽ ꓡꓳꓹ ꓪꓽ ꓚꓲꓺ ꓔꓯ ꓧꓪꓺ ꓠꓹ ꓟ ꓢꓼ-ꓓꓳꓸ ꓟꓵꓽ ꓕꓲꓽ ꓒꓳꓹ ꓗꓪ ꓙꓰꓳ= ꓢꓼ-ꓓꓳꓸ ꓟꓵꓽ ꓠꓬ ꓪꓽ ꓚꓲꓺ ꓡꓳ ꓘꓳꓽ ꓬꓲꓸ ꓕꓸ ꓬꓲꓸ ꓕꓸ ꓝꓸ ꓢꓲ꓾ ꓮꓽ ꓟꓬꓹ ꓙꓳˍꓟ ꓪꓴꓸ ꓠꓬꓲ ꓙꓰ ꓟꓽ ꓧꓪꓸ ꓡꓰꓳ꓿

ꓤꓽ ꓠꓬ ꓖꓳ ꓗꓪ ꓐꓰ ꓔꓬꓹ ꓖꓴ ꓦꓲꓻ ꓫꓬꓹ ꓢꓲ ꓔꓬꓹ ꓠꓹ ꓟ ꓗꓷ ꓡꓰꓳ= ꓖꓳ ꓡꓱ ꓐꓰ ꓢꓯꓼ ꓪꓽ ꓓꓽ ꓟ ꓙꓳ ꓢꓴ ꓤꓽ 3 ꓣꓳ ꓠꓬ꓾ ꓕꓲꓽ ꓖ ꓕꓲꓽ ꓟꓵꓽ ꓗꓷ ꓡꓰ ꓟ ꓪꓴꓸ ꓠꓬꓲ꓾ ꓬꓲꓸ ꓪꓽ ꓠꓯꓸꓼ ꓗꓪ ꓙꓳˍꓟ ꓢꓯꓼ ꓪꓽ ꓓꓽˍꓟꓲ ꓕꓲꓽ ꓝꓸ ꓐꓰ ꓕꓲꓽ ꓝꓸ ꓡꓱꓺ ꓡꓰ ꓢꓲ꓾ ꓢꓯꓼ ꓐꓽ ꓡꓰꓳ꓿

ꓖꓳ ꓟ ꓑꓶꓸ ꓓꓴ ꓣꓳꓽ ꓡꓲ-ꓢꓴ ꓐꓴ ꓠꓬ ꓮꓽ ꓠꓱꓺ ꓕꓯꓽ ꓢꓯꓼ ꓪꓽ ꓮ ꓟꓬꓺ ꓙꓳ ꓢꓴ ꓐꓯ ꓥˍꓟꓲ꓾ ꓕꓲꓽ ꓠꓲꓹ ꓕꓲꓽ ꓪꓸꓼ ꓟꓽ ꓙꓬꓹ ꓔꓬꓹ/ꓟꓽ ꓬꓰ ꓔꓬ, ꓕꓲꓽ ꓖ ꓕꓲꓽ ꓟꓵꓽ ꓥˍꓟ ꓪꓴꓸ ꓠꓬꓲ ꓢꓯꓼ ꓐꓽ ꓡꓰˍꓟ ꓥꓳ꓿

ꓚꓺ ꓟꓲꓽ ꓕꓱ ꓟ “ꓟꓶꓽ ꓡꓰ ꓒꓲꓼ ꓡꓰˍꓟ ꓡꓲ-ꓢꓴ ꓢꓯꓼ ꓪꓽ ꓓꓽ ꓙꓳ ꓢꓴ (3) ꓣꓳ ꓚꓺ ꓟꓲꓽ” ꓔꓯ ꓢꓷꓸ ꓢꓴ꓾ ꓞꓲꓼ ꓪꓴꓽ ꓢꓴ ꓡꓲ-ꓢꓴ ꓞꓳ ꓟꓳꓽ ꓐꓴ ꓠꓬ꓾ ꓕꓲꓽ ꓖ ꓕꓲꓽ ꓟꓵꓽ ꓗꓪ ꓔꓬꓹ ꓟ ꓣꓳꓽ ꓡꓲ-ꓢꓴ 3 ꓣꓳ ꓐꓴ ꓕꓲꓽ ꓧꓪꓹ ꓜꓲꓼ ꓛꓲ ꓡˍꓟ ꓦꓬꓼ ꓠꓬꓲꓺ ꓛꓲ ꓡˍꓠꓬ꓾ ꓢꓯꓼ ꓪꓽˍꓟꓲ ꓕꓲꓽ ꓧꓪꓹ ꓙꓳ ꓡ ꓢꓲ꓾ ꓣꓳꓽ ꓡꓲ-ꓢꓴ ꓐꓴ ꓪꓴꓽ ꓡ ꓟꓴ ꓡ ꓚꓰꓼ ꓥꓳ ꓐꓰ ꓥꓳꓻ ꓡꓳꓸ ꓔꓬꓹˍꓟ ꓥꓳ꓿

ꓚꓺ ꓟꓲꓽ ꓠꓬ꓾ ꓕꓱ ꓗꓪ ꓛꓲ ꓡꓰꓼ ꓥꓳ꓿ ꓕꓳꓽ ꓶ ꓵꓺ ꓢꓴ ꓮꓽ ꓙꓵꓽ ꓢꓴ ꓐꓴ ꓠꓯꓸꓼ ꓗꓪ ꓪꓴ-ꓢ ꓶꓼ ꓥꓳꓽ ꓙꓱꓽ ꓖꓶꓽ ꓝꓲ꓿ ꓧꓪ. ꓧꓪꓸꓼ=

ꓚ ꓟꓲꓽ ꓐꓳ ꓢꓴ꓾ ꓟ. ꓒꓽ ꓥꓪ.‐ꓬꓳ.‐ꓢꓯ.

Spread the love

Leave a Reply

Your email address will not be published.